Si dalka la isugu xidho dhaqaalihiisana lawada wadaago, wuxu xisbigu u hawl geli doonaa in muddo shan sano ah uu isku-xidho magaalooyinka waaweyn ee gobolada iyo degmooyinka oo dhan, isagoo samayn doona wadooyin laamiya iyo kuwo caro-tuul ah, islamarkaana hor marin doona garoomada diyaaradaha, dekadaha iyo khadka isgaadhsiinta ee telefoonada, wuxuu xisbigu daryeeli doonaa dadka hanan kari waayey maalin-nololeedkoodii sida, dadka waaweyn, kuwa aan cid lahayn, iyo dadka laxaadka la’.

Wuxuu xisbigu u hawl geli doonaa ugu horayn waxyaabaha lagama maarmaanka ah ee daryeelka bulshada isagoo kaalin laxaad leh ka qaadan doona ogaanshaha, iyo la socodka arimaha dhaqaalaha siyaasadda, bulshada, tacliinta, isgaadhsiinta iyo guud-ahaanba kor u qaadida wacyigelinta bulshada.Wuxuu kaloo xisbigani ka shidaal qaadandoonaa ugu horeyn baahida bulshada oo ay ugu horayso saddexda "H"da ka kaca sida, Hoyga, Hunguriga iyo Huga oo asaas u ah daryeelka bulshada.

Maadaama uu dhaqaalaha uu ku fadhiyo xoolaha nool dadkeenuna u badan yahay Reer guuraa, xisbigu wuxuu gacan weyn siin doona kobcinta daryeelka iyo dhaqaaleynta Reer-guuraaga, isagoo u hawl geli doona siduu u furi lahaa baanka horumarinta Reer-guuraaga (Rural Development Bank). Si looga ilaaliyo dadka Reer-guuraaga ah iyo Beeralayda ah ee ku soo qulqulaya magaalooyinka waaweyn. Wuxuu xisbigu hirgalin doonaa siyaasado ballaadhan oo ku waajahan horumarinta miyiga (Rural Development) taasoo iska hor istaagi doonta in dadku ku soo qamaamo magaalooyinka.

Xisbigu wuxuu ku talin doona in la sameeyo Wasaarada Bulshada iyo Horumarinta Awooda Bini’aadamka (Ministry of Social and Human Resources). Wasaarada oo la socondoonta bahida mujtamaca dan-yarta ah isla markaana ka shaqayn doonta horumarkooda iyo kor u qaadista waxbarashadooda iyo caafimaadkooda. Waxa la dhisi doona Hay'ad madax banaan oo ku tiirsan aqoonyahaniin sare oo dusha ka ilaaliya la socodka wasaaradaha (Monitoring Committee) ilaaliyana tayadooda iyo kartidooda. Gudidu waxay soo saari doonaan war-bixin sanadeed ku saabsan shaqada iyo habdhaqanka wasaaradaha, hay’adaha dalka iyo wasiirada dowlada iyaga oo isla markaana soo jeedindoona talooyin iyo talaabooyin ku haboon.

Waxaa ku wajib ah dowlada in ay ku dhaqmaan talooyinka gudida. Isla markaana ka qaadaan talaabooyin ku haboon madaxda warbixintu u sheegto, waxtar la’aantooda amaba cadaalad daro iyo musuqmaasuq. Wuxuu noqon doonaa warbixin qiimayndoota wax qabadka hay’ada dalka siiba kuwa dowlada.

Xisbigu wuxuu ka digtoonaan doonaa in dhaqaalalaha la iskugu-soo ururiyo caasimada iyo magaalooyinka waaweyn ee gobolada, waxaanu xooga saari doonaa sidii loo kobcin lahaa, loona hor-marin lahaa dhaqaalaha magaalooyinka yar-yar. Inagoo Illaahay inagu manaystay xeeb dheer, hase ahaatee dhaqan ahaan aanaynu ka faa`iidaysan, wuxuu Xisbigu ku dadaali doonaa sidii loo horumarin lahaa magaalooyinkeena xeebaha ku yaala, loona samayn lahaa meherado iyo mashaariic ku xidhiidha kheyraadka badda, xisbigu wuxuu baadi dooni doonaa habkii uu u kabi lahaa kaluumaysatada, beeralayda, iyo xoolo-dhaqatada si dadku ugu laabtaan hab dhaqameedadoodii.

Xisbigu wuxuu hirgalin doonaa siyaasadda abaabulka mujtamaca si looga faa´iidaysto bulshada, loona mideeyo isla markaana loo faa´iideeyo, wuxuu markaa Xisbigu samayn doonaa waxbarasho Qiimajeedu (Value) sareeyo iyo wacyi galin iyo baraarujin joogto ah (Education & Public Awareness) Xisbigu wuxuu sameyn doonaa siyaasad furan oo uu kula dhaqmi doono shacbiga iyo dawladaha jaarka ah, isagoo soo dhaweyn doona saaxiibtinimada dawlada dalka Itoobiya oo aynu wadaagno dal iyo dadba.

Wuxuu Xisbigu dhiiri galin doonaa in dalka aynu deriska nahay ee Geeska Afrika gaar ahaan Ethiopia, in lala wadaago mashaariic lagu horu marinayo dhulka loo yaqaano (Hawd and Reserve Area) ee soonaha shanaad. Xisbigu wuxuu maalgelin weyn ku samayn doonaa dekeda Berbera si ay u noqoto deked ay ka faa'iideystaan wadamada Bariga Afrika ee aan bada lahayn, isagoo iskaashi la yeelan doona dalalka Eeshiya, gaar ahaana Hongkong oo aqoon dheer u leh isticmaalka dekedaha.

Inagoo ku jirna casriga loo yaqaano Casriga Tiknoolejiga wuxuu Xisbigu ku dadaali doonaa sidii dadka Reer-Somaliland ay u baran lahaayeen IT isgaadhsiinta casriga ah, isagoo maalgelin badan gelin doona Jaamacadaha Somaliland, Dugsiyada, samayna doona Macahadyo cilmi baadhiseed, xisbigu wuxuu samayn doona magaalooyin u khaasa cilmiga Tiknoolajiga oo xisbigu soo jeedin doono in laga dhigo (High Technology Centre) ama xarunta cilmi-baadhista cusub.

Xisbigu wuxuu xooga saarayaa siduu u soo saari lahaa jiil cusub oo Reer-Somaland ah oo ku qalabaysan cilmigan cusub, isagoo islamarkaana ka shaqayn doona, siduu u sahli lahaa bulshada Somaliland inay xidhhiidh la yeelato Farsamada iyo isgaadhsiinta cusub ee Internet-ka.

Xisbigu wuxuu dadaal lama huraan ah u geli doonaa sidii uu u yarayn lahaa ama u joojin lahaa isticmaalka Qaadka mustaqbalka isagoo isla markaana olole wacyi gelina ku samayn doona guud ahaan bulshada sidii ay uga fogaan lahaayeen wax alla wixii khatar Diineed, caafimaad maskaxeed iyo jidheedba u geysanaya oo loo fahamsiiyo dadweynaha wixii horumar iyo waxqabadba u keeni kara.

Xisbigu wuxuu si lagama maarmaan ah xooga u saarayaa sidii Bulshada Reer-Somaliland u fahmi lahaayeen wacyiga iyo wergelinta xilligan casriga ee aan ku jirno, taasoo keenaysa tiigsimaad nolol hor leh iyo wax soosaar dhab ah oo loo midaysan yahay, taasina waxay tilmaamaysaa tallaabo hor leh oo loogu gogol xaadhayo horumarinta iyo la socodka waaqiciga dunida iyo lafgalkeeda.

Xisbigu wuxuu marwalba tixgalinayaa xoogaynta habka dhaqan-dhaqaale iyo horu socodka dhaqaale kasoo ka ambaqaadi doona xalaaleynta dhaqaalaha wanaagsan ama isku dhafan (Mixed Economic) iyo xaaraamaynta dhaqaalaha xun ee xakamaysan (Monopoly). Xisbigu wuxuu daaha ka furayaa soona bandhigi doonaa qaab casriya oo ku wajahan siyaasadda dhaqaalaha oo looga faa´iidaysanyo wax soosaarka bulshada, isla markaana la xoojinayo casriyeynta wax soosaarku ka kooban yahay sidii looga shaqayn lahaa loogana faa’iídaysan lahaa khayraadka dabiiciga ah ee dhulka iyo manaafacaadkiisa kala duwan.

Xisbigu wuxuu dhiirigelin doonaa madaxbanaanaynta dhaqaale ee gobol, degmo, iyo tuuloba, isagoo xor uga dhigi doona in degmo kastaaba ay qorshaysato siyaasadeeda kobcinta dhaqaalaha, una madax banaanaato in ay urursadaan canshuurahooda, islamarkaana ay dawlada dhexe kobcin doonto wixii ka badan awoodooda. Xisbigu wuxuu diyaarin doonaa qorshayaal cusub oo lagu soo celinayo baadkii iyo doogii iyo sidii loogaga hortegi lahaa xaalufka iyo nabaadguurka, waxaana laga shaqayn doonaa sidii si buuxda looga faa’iideysan lahaa roobka iyo biyaha dalka, lagana horjoogsan lahaa in biyahaasi ku qulqulaan bada, waxa kale oo xisbigu gacan weyn ka geysan doonaa dib u dhiraynta dhirta iyo ilaalinta kaymaha.

Wuxuu xisbigu ku dadaali doonaa dib u soo celintii ugaadha iyo duur-joogta, taasoo la samayn doono seero lagu ilaaliyo ugaadha iyo kaymo u gaara (Conservation).

Iyadoo dalkeenu ku caan baxay dhaqanna u noqotey in dhaqaalaheenu ku tirsanaato xoolaha oo keliya iyo suuq kaliya wuxuu xisbigu dadaal u geli doonaa siduu u samayn lahaa ilo dhaqaale oo kala duwan islamarkaana suuqyo kale duwan loo heli lahaa kuwaas oo haynaan loo sameyn lahaa. Xisbigu wuxuu hirgelin doonaa, dhiirigelin doonaa, horumarin doonaa khayraadka dalkeena, ka beriga iyo ka badaba, waxaa kale oo xisbigu maal-gelin doonaa soosaarida shidaalkeena iyo macdanta dhulkeena ee Ilaahay inagu manaystay islamarkaasina wuxuu horumarin doonaa Beeyada iyo Fooxa ee ka buuxa gobolka Sanaag.

Xisbigu wuxuu dhiirigalin doonaa samaynta warshado Hilib iyo qaar Kaluun si aynu ula tar-tano wadamada kalluunka iyo xoolaha dhoofiya.

Xisbigu wuxuu dhiirigalin doonaa soona dhawayn doonaa maalgelinta shisheeye isaga oo diyaar gareyn doona sharciyo iyo xaalad dabacsan oo soo jiidata maalgelinta shisheeye. Xisbigu wuxuu xooga saari doonaa sidii loo dhiirgelin lahaa dhoofinta wax soosaarka qaranka isagoo soo saari doona sharciyo lagu yaraynayo cashuuraha alaabta la dhoofiyo, si ay uga faa´iideystaan uguna dhiiradaan tijaarta wadaniyiinta ahi.

Xisbigu wuxuu hirgelin doonaa isticmaalka waxsoosaarka qaranka (national production) isagoo isla markaa aan lumineyn tartanka alaabta shisheeye, tiiyoo kor loo qaadi doono ama laga shaqayn doono kor u qaadida tayada iyo tirada alaabta wadaniga ah.

Xisbigu wuxuu ku dadaali doonaa in dadka ka bedelo habkii ku dhisnaa wax soo dejiska (Import) una jihayn doono siyaasad ku dhisan wax dhoofin "Export", si loo kobciyo dhaqaalaha wadanka. Si loo helo loona hirgaliyo qorshahaasi dhaqaale, wuxuu xisbigu samayn doonaa Wasaarad Maaliyadeed oo adag kuna qalabaysan khubaro ku xeel dheer dhaqaalaha iyo Bangi Dhexe oo madax banaan.

Labada hay’adood oo xilkoodu ahaan doono ilaalinta iyo horumarinta dhaqaalaha Somaliland kaasoo wax weyn ka bedeli doona horumarka siyaasada dhaqaale ee bulshada. Dawladu waxay dusha ka ilaalin doontaa suuqa dhaqaalaha iyadoo u dayn doonta in uu iskii u rog-rogmo isla markaana aan gacmaha ka laaban doonin inuu fakado, tiiyoo markii loo baahdo gacan kooban saari doonta, marka loo baahdana xakamayn sahlan isticmaali doonta.

In kastoo xisbigu dhiiri-gelin doono lahaanshaha gaar-ahaaneed hadana ma jiraan wax ka mamnuuci doona in dawladu yeelato Hay´adaha ay u aragto inay faa’íido ku jirto in dawladu yeelato.

Maalgelinta shisheeye wuxuu xisbigu ka ilaalin doonaa inay khatar ku keento degaanka iyo dhaqanka islamarkaasina waxay kaloo ka ilaalin doontaa in shirkadaha shisheeyuhu ay dhiigmiirtaan shaqaalaha wadaniga ah, iyagoo u qeexi doona qiimaha u yar ee mushahareed ee lagu shaqayn karo.

Xisbigu wuxuu kaloo dhiirigalin doonaa inay samaysmaan ururo shaqaale oo ilaaliya danaha shaqaalaha wadaniga ah, xisbigu wuxuu xooga saari doonaa si uu ilaalin lahaa heerka nabadgelyada ee shirkadaha shisheeyaha si ayna khatar u gelin caafimaadka iyo nolosha shaqalaha wadaniga ah.

Xisbigu wuxuu kaalin xoog leh uu ka gaysan doonaa sidii uu u kala dooran lahaa shirkadaha dhabta ah ee si wax ku ool leh ugu qabanaya dalka iyo kuwa kale ee lugooyada iyo wax qabad la´aanta wada, sidaas darteed waxa lagama maarmaan ah in ururku ku hawlanaan doono sidii maalgelin badan looga heli lahaa debedaha iyadoo loogu soo dabaalayo wax ka qabashada wadanka.

Xisbigu waxaa kale oo uu la dagaalami doonaa musuqmaasuqa, qaraaba-kiilka, eexda, mid toosan iyo mid dadban, ficiladaas oo dhaqaalaha naafayn kara. Waxa la samayn doonaa hay’ado u qalabaysan la dagaalanka xatooyada xoolaha dadweynaha iyo waxyeelida dhaqaalaha.

Waxa la samayn doonaa in la shaqaaleeyo dad ku caan ah daacadnimo, islamarkaana khibrad u leh hawlahooda, iyadoo xul adag lagu samayn doono dad ka shaqaynaya ilaha dakhliga dalka, tiiyoo la baadhi doono aqoonta shakhsiga, damiirkiisa, diintiisa, balwadiisa iyo hab-dhaqankiisa (Life Style).

Xisbigu wuxuu u hawl geli doonaa sidii dhamaan loo shaqaaleysiin lahaa muwaadiniinta Reer-Somaliland, ee aan hawlgabka ahayn, iyadoo markastana xirfadooda kor loo qaadi lahaa si ay ula socdaan isbedelka Tiknoolajiga (ee siyaasada Waxbarashada ee xisbiga).

Ugu dambayn wuxuu xisbigu dadaal u geli doonaa sidii Somaliland looga dhigi lahaa quwadda dhaqaalaha ee Afrikada Bari (Economic Power House of East Africa). Iyadoo xeebaheena Saylac, Lughaya, Xiis, Maydh iyo Laas-qoray laga hirgelin doono dekedo carsi ah, dekadda Berberana looga dhigi lahaa badhtamihii baayacmushtariga ee Bariga Afrika (Hup of East Africa).

Inagoo ka faa´iideysaneyna bogcadeena Ilaahay inagu abuuray, waxaynu ka shaqayn doonaa sidii Somaliland u noqon lahayd Biriijka isku xidha Eeshiya, Afrika, Yurub iyo Amerika.

Wuxuu xisbigu ku dadaalii doona in muddo shan sano dexdood ah laga simo sidii dadka ku nool magalooyinka waweyn iyo kuwa yar-yar loo siin lahaa biyo nadiif ah. Si loo yareeyo cudurada shubanka iyo dhimashada caruurta reer Somalinad.

Si loo dhiso Bulsho hanaanka barnaamijka xisbiga, isla markaana dhista mujtamc iyo dal casri ah wuxuu xisbigu galindoona dhaqaale badan waxbarashada dalka. Xisbigu wuxuu ku dhaqaaqii doonaa in loo helo waxbarasho ilma-kasta oo reer Somaliland ah, ugu dambayntana waxa xisbigu ku dadaali doonaa in qasab laga dhigo waxbarashada ilaa fasalka sideedaad.

Xisbigu wuxuu u taaganyahay sidii loo hirgalin lahaa waxbarasho ka soo jeeda dhaqanka diinta Islaamka, taas oo qofka ka dhista dhinaca Imaanka, Islaam ahaan, qof ahaan, taas oo qofka horumarisa bartana nolasha fiican iyo habkaa toosan ee mujtamaca kula noolaan lahaa kuna ilaalinlahaa xuquudiisa iyo waajibka ka saaran ilaalinta iyo difaaca Diintiisa iyo Dalkiisaba. Xisbigu wuxuu u taagan yahay sidii dalka looga hirgalin lahaa waxbarasho ku salaysan wax soo-saar iyo tignoolajiga cusub. Tacliin aan ku fadhiyin wax ku cun ee ku salaysaan wax ku kordhi, waxbarasho tayo iyo tiraaba leh.

Xisbigu wuxuu u taagan yahay sidii looga hirgelin lahaa waxbarashada dadka heer tuulo, degmo iyo gobolba. Xisbigu wuxuu ka shaqayn doonaa sidii waxbarashada loo gaadhsiin lahaa reer guuraaga, iyadoo la samayn doono waxbarasho ka mas’uul ah waxbarashada reer guuraaga. Waaxda waxa laga dhigi doonaa waaxda ugu mushaharka badan wasaarada, iyada oo dhinaca kale macalinku ka mid noqon doono dadka degaanka lana bari doono howshan deegaanka, uu noqon doono shaqaalaha ugu mushaharka badan Somaliland.

Xisbigu wuxuu ka dhigi doonaa waaxda waxbarashada reer guuraaga mid socota (Mobile Education Unit). Waaxdaas waxa lagu qaabili doonaa qalabka waxbarashada ee casirga ah iyo macalimiin si gaar ah loo soo tababaray. Xisbigu wuxuu xooga saari doona sidii wax loo bari lahaa ilma-kasta oo reer Somaliland ah meel kasta ha joogee. Xisbigu wuxuu u taagan yahay in Jahliga laga dhameeystiro Somaliland sida ugu dhakhsaha badan si looga baxo Faqriga iyo Baahida oo ah hooyada xumaanta iyo dhanbiga.

Xisbigu wuxuu hubin doona waxbarashada caruurta ka soo jeeda guryo hanti yar iyo dadka laga tirada badan yahay. Waxaa la caawindoonaa caruurtaas waxbarasho bilaash ah, lacag la’aan ah, marka la hubiyo in wax la’aantu ka dhab-tahay. Isla markaa waxa dawlada ku waajib ah in ay tiro cayiman u banayso Jaamacada iyo meelaha waxbarashada sareba caruurta faqiirada iyo dadka laga badanyahay.

Xisbigu wuxuu ku dhaqaaqi doonaa sidii loo casriyayn lahaa farsama yaqaaniinta dhaqan sida (traditional skills) tumaalaha iyo kabatolayaasha, loogana saari lahaa magac xumadii badaw nimo ee sarneed.

Xisbigu wuxuu sameyn doonaa barnaamijyo iyo mashaariic u gaar ah horumarinta waxbarashada, caafimaadka iyo hoy’ga mujtamaca laga badan yahay ee hore loo yasi jiray. Waxaa laga shaqayn doonaa sidii loogu abuuri lahaa isku kalsooni iyadoo dinaca kalena la hormarin doono hantidooda iyo wax lahaanshahooda. Waxaa la qaadi doonaa olole diineed oo sharaxaysa ka soo horjeedka Diinteena Suuban ee yasida muslimiinta iyo dadkaba guud ahaan.

Xisbigu wuxuu dhiiri gelin-doonaa waxbarashada furfuran ee aan ku soo ururin hal meel (Decentralized Education system). Tiiyoo Waxbarashada sare ee dalka aan hal meel amaba laba meelood lagu soo koobayn, Gobol kastana waxa laga hirgalindoonaa waxbarashda sare ee ku haboon, isla markaa waxa la sameyn doonaa magaalooyin u khaas ah Cilmiga Cusub iyo Tiknoolajiyada. Xisbigu wuxuu samayn doonaa Machadka Tiknoolajiga "Institute of Technology", kaas oo khaas u noqon doona horumarinta Sayniska iyo Cilmiga Cusub. Xisbigu wuxuu uu ugu deeqi doonaa lacag badan si loo dhiiri galiyo cilmi barayaasha Somaliland.

Si looga saaro mugdiga bulshada, xisbigu wuxuu xooga saari doonaa barashada Kitaabka Kariimka iyo Xadiisyada Rasuulka SCWS. Si loogu ababiyo caruurta Somaliland Diintooda iyo Sunaha Nabiga suuban SCWS, xisbigu wuxuu casriyayn doonaa mal-caamadaha Qiraanka, iyada oo la tababari doono macalimiinta isla markaana mushahar loo qori doono.

Xisbigu wuxuu xooga saari doonaa sidii loo dhisi lahaa Dugsiyada Farsamada si looga maarmo farsamayaqaaniinta shisheeyaha ee ka qaada shaqada muwaadiniinta Somaliland. Waxa la diyaarin doonaa dugsiyo wax lagu baro shaqaalaha, shaqaalihii mutaystay shahaado dugsi, ay wajib noqondoonto xaqna u lahaandoonto in mushaharka loo kordiyo isla markaana la dalacsiiyo.

Xisbigu wuxuu samayn doonaa machadyo takhasus ah oo shaqaalaha aqoontooda kor loogu qaado, wuxuu maalgalin weyn ku samayndoono dugsiyada lagu baranaayo horumarinta xoolaha iyo reer guuraaga.

Xisbigu wuxuu hirgalindoona barnaamijka iyo habka waxbarasho ee furfuran, tiiyo degmo kastaba ay xaq u yeelandoonto talada dugsiyada. Waxa hagida iyo go’aamada dugsiyada wax lagasiindoonaa waalidka ardayda iyo duqeyda degmada

Xisbigu wuxuu ku talindoonaa in lakala saaro dugsiyada wiilasha iyo gabdhaha, tiiyo aynu soo marnay dhibaatadeeda iyo khasaaraheeda, isla markaana diinteenu ina farayso, wajibna inagu ah in aynu raacno. Waa wajibka dowlada siiba Wasaarada Waxbarashada in ay hubiso in hablaha iyo inamada si siman waxbarashada u helaan, si loga hortago dhaqankii hablaha aanay tacliinta loo wada keeni jirin. Waxaa iyadana ah masuuliyad wasaaradaha, Diinta, Waxbarashada iyo Caafimaadka ka hortaga iyo joojinta Gudniika Fircooniga ah.

Waxaa xisbigu u taaganyahay sidii wax loo bari lahaa, caruurta INDHA IYO DHAGAHA LA'. Waajib culus oo khaas ah ayaa ka saaran dowlada iyo bulshadaba sidii wax loo bari lahaa dadka laxaadka la’ iyadoo loo samaynayo dugsiyo iyo meelo waxbarasho oo u khaas ah.

Waxbarashada dalka waxaa ka masuul ah dowlada, meelaha waxbarashada sida mal-caamadaha, dugsiyada, jaamacadaha iyo meelaha cilmi baadhista oo dhan waxay hoos iman doonaan dowlada. Waxaa la ilaalin doona tayada waxbarashada iyo casriyaynta habka waxbarasho. Si aanay u soo bixin dugsiyo mujtamac wanaagasanyahay amaba laga aduun badan yahay iyo dugsiyo kuwa aduunka badan. Waxaa lagu dhaqaaqi doona sidii loo tirtiri lahaa aqoon-darada, tiiyoo la samayndoono waxbarasho dadka waawayn. Waxaa lagu xidhi doonaa shaqaalaha wax qorka iyo wax akhriska si loogu qasbo waxbarashada.

Xisbigu wuxuu xoojin doonaa, dadka degaanka si ay gacan ugu yeeshaan talada waxbarashada ubadkooda iyo wadida dugsiyada degmadooda. Xisbigu wuxuu culays saari doona sidii ardayda Somaliland loo bari lahaa taariikhdii madoobayd ee ka soo martay midawgii Somaliland iyo Somaliya. Xasuuqii maamulkii Siyaad Barre ee adeegsanayay dadka Somaliya ay u gaysteen dadka reer Somaliland. Si aanay mar dambe ugu dhicin mujtamaca Somaliland in ay qaataan talaabadii qaladka ahayd ee 60kii, waxaa lagu nuux-nuuxsan doona kala duwanaanta dhaqan iyo caado ee bulshada Somaliland iyo Somaliya.

Xisbigu wuxuu dhiirigalin doona waxbarashada diinta Islaamka tiiyoo maclinka diintu ka mushahaaro badan doono maclimiinta kale. Waxa qasab noqon doonta in ardaygu shahaadada heli doonin hadii aanu gudbin madaada diinta.