Axdiga ciidanka Qaranka waxa u saldhig ah hab difaaca Qaran oo ka baxsan kana maqantahay siyaasada weerar iyo ku xad gudub dalalka jaarga ah. Ciidanka Qaranku wuxuu ka mas'uul noqondoonaa sugidda xuuduudaha dalka: Barri, Bad iyo Cirba. Waxaa ciidanka Qaranka laga xuli doonaa dugsiyada waxbarashada iyaydoo si gaar ah loo madhan doono ardayda askariga ah iyaadoo lagu soo jiidan doono nolol fiican.

Xisbigu wuxuu u taaganyayhay sidii ciidanka Qaranku u noqon lahaa mid lagu faano loona kala baratamo ka mid noqoshadiisa iyo ka howl galkiisa. Ciidanka Qaranka waxaa laga dhigi doonaa ciidan caan ku ah Asluub iyo Karti, ciidan xor ah kana maqan loolanka siyaasada dalka. Ciidan Qaran oo aqoomeed (Professionals). Waxaa la soo afjari ciidankii ku dhisnaa askar aan waxna qorin waxna akhriyin (Illiterate Soldiers).

Tirada ciidanka waa la soo koobi ugu badnaan waxaa laga dhigi ILAA LABAATAN KUN (20,000). Waxaa kor loo qaadi aqoontooda iyo tababarkooda. Ciidanku wuxuu isha ku hayn doonaa Tignolajiga Cusub iyo Hubka Casriga ah ee wakhti kasta socda.

Waxaa la dhisi doona Jamaacda amaba Kuliyad ciidaan oo casri ah kana howlgalaan macalimiin ku xeel dheer cilmiga Milatariga oo ka soo jeeda muwaadiniin iyo Ajnabiba. Waxaa Xisbigu ka shaqayndoonaa in ciidanku aanay baran oo kaliya isticmalka hubka Casirga ah ee la bari doono sida loo sameyo iyo sida u sameeysanyahay. Waxaa xooga la saaridoona sidii dalkeenu u yeelan lahaa warshado wadani ah oo soo saara qayb ka mid ah baahida qalab ciidan.

Ciidanku kuma ee kaan doono difaaca dalka ee wuxuu si hagarla’aan ah uu ku howl gali doonaa horumarinta dalka iyo casriyayntiisa. Ciidanka waxaa loo samayn doonaa guryo iyo goobo u gaar ah. Waxaa laga ilalaalin doonaa in ciidanku ku ekaado aqoonta dagaalka oo kaliya ee waxaa loo samayndoonaa xirfado kala duwan si ay gacan uga gaystaan horumarka dalka.

Ciidanka Qaranka ee Somaliland waxaa loo tababari doonaa sidii uu gacan uga gaysan lahaa ciidamada QM (UN) ee ka hawl gala nabad ilaalinta dalalka ay ka taagan tahay qaab siyaasadeed. Ciidanka Qaranka Somaliland waxaa ka xaaraan ah in uu ku duulo dal kale hadii aanay khatar galin jiritaanka iyo nabad gelyada dadka reer Somaliland. Ciidanka Somaliland waxaa ku waajib ah in uu kaga dabo taga meel walba wixii khatar galiya Qaranimada dalka iyo nolosha iyo daganaanshaha ummadda.

Ciidanka Qaranka waxaa lagu xoojindoonaa barashada DIINTA Islaamka iyo Shucaaceeda, waxaa loo tababri doonaa sidii uu ciidanku u ilaalin lahaa asluubta iyo dhaqanka Islaamka isla markaana talaabo uga qaadi lahaa sidii loo horjoogsan laha wixii sumanaya Diinta Islaamka.

Maadaama shariicada Islaamka iyo Distuurka Jamhuuriyadu yahiin hay’ada dalka ugu saraysa, ciidanka iyo madaxda dalkuba waxay ku dhaaran doonaan "Ilaalinta iyo Difaaca shareecada Islaamka iyo Distuurka."

Ciidanka qa’raanku wuxuu ka mas'uul noqondoonaa ilaalinta iyo daryeelka noloshii halgamayaashii SNM iyo carruutooda. Waxaa Ciidanku qori doonaan taariikhdii Mujaahidiintii ku shahiiday xorayntii dalka iyo tiradoodii.

Xisbigu wuxuu soo jeedin doonaa in maalin qiimo leh oo la xuso lagana dhigo malintii 27kii May 1988. Maalintii SNM-to weerarka geesinimada leh ku samaysay ciidamadii Faqashta ee deganaa magaalada Burco. Wuxuu xisbigu soo jeedin doonaa in loo bixiyo maalintaas Malintii Guusha (Victory Day).

Wuxuu Ciidanku samayn doonaa meelo lagu xanaaneeyo agoonta ciidanka iyo lacag u gaar ah sidii ay u shaqayn lahayd goobahaasi. Ciidanku wuxuu xaq u yeelan doonaa in uu yeesho meelo wax soo-saar si ay u kabaan kharashkooda guud iyo baahidood badan.

Ciidanka Qaranku wuxuu lahaandoonaa Hay'ada Sirdoonka ee Ciindanka "Military Intelligence Agency" Hay'adaa masuuliyadeed waxay noqondoontaa soo ururinta iyo raadinta tayadda iyo sirta ciidamada dalalka dibada ee noqonkara cadowga Somaliland. Waxaa si fiican loogu qeexi doonaa shaqada hay'ada warqad rasmiya marka la aasaaso.

Ciidanka Qaranka waxaa si rasmiya loogu dhigi doonaa taarikhdii mujaahidiintii dib u xoreeysay Somaliland. Waxay noqondoontaa in ay qasab ku noqoto barashada taariikheed ee mujaahidiinta ciidanka qaraanku. Wuxuu xisbigu dhiirigalindoonaa lacag badanna u qoondayndoonaa cilmi baadhista arimaha milatariga, si loo helo ciidan leh culimo ku xeel dheer sayniska "military researchers".

Askarta ciidanka qaranka waxaa la baridoonaa adkaynta midnimada dalka, difaac diinta Islaamka iyo ilaalinta xuquuqda bini-aadamka. Waxaa la baridoona karaamada ILAAHAY ku manaystay Bini-aadamka iyo sharafta uu mudanyahay.

Waxaa lagu barbaarindoona ilaalinta xoriyatul qowlka iyo qaranimada dalka. Waxaa laga fogayndoonaa wax alaaliyo wixii wax u dhimaya sharafta dadka iyo dalkaba.