GUDDOOMIYAHA G. WAKIILADA IYO
GUDDOOMIYAHA UCID OO CARUUR IYO CIROOLEBA KU SOO DHAWEEYAY FINLAND:
Guddoomiyaha G.
Wakiilada Md. Cabdiraxman Maxamed Cabdillahi (Cirro) iyo Guddoomiyaha xisbiga
UCID Eng. Faysal Cali Waraabe ayaa dadka reer Finland kusoo kaga hortageen
Madaarka Helsinki-Vantaa si ay ugu soo dhaweeyaan saacaddu markay ahayd sideedii
fiidnimo. Qaybta madaarka ee dadku kasoo degaan ayaa ilyartu is qabatay oo dadka
reer Somaliland buuxiyeen iyaga oo sita oo lulala calanka Somaliland. Soo
dhawayntan oo aan loo kala hadhin si heer qaran ahna loo agaasimay ayaa waxa
kasoo qaybgalay rag, dumar, dhalinyaro waayeel iyo xataa caruur yaryar. Waxaa si
gaara xusid u mudan sidii loogu xoomay ee la isla oogsaday markii ay albaabka
kasoo baxeen Cabdiraxman iyo Faysal iyadoo dadka qiiro wadaninimo iyo xamaasadi
wada saaqday.
Soo dhawayntan
oo dadka reer Somaliland si weyn u abaabulayeen maalmihii lasoo dhaafay khaas
ayaan Jaaliyadda Somaliland ee dalka Finland ayaa ahayd mid dadka oo dhami ku
midaysnaayeen cidina aanay ka hadhin soo dhawaynta labada guddoomiye oo kasoo
dhoofay dalka Ingiriiska. Jaaliyadda Finland ayaa kiraysay bas dadka lagu soo
daabulay dad kalena waxay ku yimaadeen gawaadhi iyo basaska caadiga ah. Dadka
reer Finland ayaa soo dhawayntan u arkayey fursad ay u heleen labada Guddoomiye
oo hore dalka Finland u degenaan jiray kana mid ahaa jaaliyadda Somaliland ee
Finland ku dhaqan.
Guddoomiye Cabdiraxman waxa uu dadkii saf kala maray gacan-qaad waxaana isla
madashaa ka jeediyey khudbad kooban oo uu dadka uga mahadcelinayo dedaalka ay
galeen iyo midnimada ay muujiyeen isaga oo u sheegay in wadankiina sidaa looga
midaysanyahay horumarka wadankana meel looga soo wada jeestay. Dadka reer
Somaliland ee Finland ku dhaqan ayaa shir weyn oo Jaaliyaddu soo qabanqaabisay
kula kulmidoona Guddoomiyaha Golaha Wakiilada maalinta Sabtida ee taariikhdu
tahay 18.3.2006.
Guddoomiyaha G. Wakiilada ayaa ilaa toban maalmood ku sugnaan doona dalkan
Finland isaga oo kulamo badan la samayndoona madax sarsare oo wadankan ka tirsan.
Qarannews24
FINLAND
Ucidprty cadami
