Wuxuu hirgelin doona:

1. Demuqraadiyada Wakiilnimada "Representative Political Democracy". Taas oo uu qof kastaa oo muwaadin ah u ogalaanaysa in la doorto waxna uu doorto. Doorashooyinka Wakiilada waxaa la wadi doona ilaa heer Tuulo, Degmo, Gobol iyo Qaran.


2. Wakiilnimo toos ah. "Direct Representative". Waxaa la hirgelin doona in la qabto AFTIYO "Referendums", marka loo baahan yahay in dowladu qaado go’aamo culus sida Aftida Distuurka, Aftida ka noqosho xubin Urur Gobol ama Caalami, sida ururka jaamacada carabta.

Arimahaa qofku si toos ah ayuu xaq u yeelan doonaa in uu codkiisa dhiibto. Codaynta noocaas ah waxay ka kooban tahay HAA iyo MAYA oo kaliya.

Xisbigu wuxu dhiiri gelin doonaa ka qayb galka bulsho ee hogaanka iyo go'aaminta arrimaha dalka, taas oo kor loo qaadi doona barashada siyaasada iyo aqoonta guud ee bulshada. Wuxuu dhiiri gelin doona ka qayb galka doodaha ee bulshada siiba mujtamaca ku nool magaalooyinka dibadooda, sida miyiga iyo tuulooyinka, si looga ilaaliyo in danaystayaal siyaasiyiin ahi uga faa’iidaystaan.

Wuxuu xisbigu dhiiri galin doona ka qayb qaadashada Demuqraadiga ee ku salaysan diinta oon ahayn tan reer galbeedka (Participatory Democracy). Wuxuu xisbigu dhiiri galindoonaa samaynta Ururada Bulshad "Civil Organisation" si loo xoojiyo barnaamijka ka qayb qaadashada demuqraadiga "Participatory Democracy". Waxaa la xoojin doonaa Media, sida Raadiyowga, Telefiishanka iyo soo saarida Jaraa'idka, tiiyoo la maalgelin doono Jaraa'idka urrurada bulshada.

Xisbigu wuxuu u taagaan yahay hirgelinta maamul fidsan oo aan urursanayn "Decentralized System" oo casri ah. Bulsho isku kala raacda, dan iyo aqoon isla markaana ku midaysan danta guud. Xisbigu wuxuu ku dadaali doona hir-gelinta mujtamac ku qalban shacaa’irka Islaamka, Anshaxa iyo Asluubta Islaamka, ku faana taariikhdiisa, isku kalsoon shaqeeyana. Xisbigu wuxuu ka ilaalin doonaa mujtamaca wax alaaliyo wixii sumaynaya oo badhxaya Asluubta iyo hab dhaqanka iyo ku dhaqanka Islaamka.

Siyaasada guud ee xisbigu waxa u saldhig ah dimuqraadinimo iyo furnaan (Democracy and Openness). Xisbigu wuxuu si gaar ah u ilaalin doona daryeelka dadka laga faraha badan yahay iyo dadkii wakhtigii jahliga hoos loo eegi jiray. Xisbigu wuxuu ka shaqeyn doonaa sidii loo horumarin lahaa loona xoojin lahaa xidhiidhka Dhaqaalaha Iskaashi iyo siyaasadeed ee Somaliland iyo dalalka kale ee aynu dariska nahay sida dalalka Bariga Afrika, dalalkaas oo inaga dhexeeyo xidhiid ganacsi iyo dan aynu wadaagno. Waxaa laga shaqayndoona sidii dalalkaa la isugu xidhi lahaa xaga dhulka, cirka iyo isgaadhsiintaba. Si dhaqaalaha wadamadaas iskugu tiirsadaan waa in la dabciyaa sarrifaada iyo cashuuraha la saaro alaabta u kala gudubta dalalkaas.

Xisbigu wuxuu ilaalin doona danaha, xuquuqda iyo hantida dadka ku soo jeeda Somaliland ee degan dalalka dibada, sida Somaliya, Jabuuti, Kiiniya iyo dalalka Carabta. Wuxuu soo afjaridoona xisbigu markii la boobi jiray, la bahdili jiray dadka dhulalka ku dhaqan ee ka soo jeeda Somaliland.

Xisbigu wuxuu ku dadaali doonaa hirgalinta nidaam xafidi doona nolosha bulshada (Social Security system). Nidaamkaas oo ugu danbaynta hubin doona in qof kasta oo muwaadini helo in uu ku noolaado nolol sharaf leh (Decent life). Si loo helo waayaha iyo xaalada muwaadin kastaa waxaa la tiirindoona dadka loona samayn doono nambaro lagu kala saaro. Habkaas oo wax ka tari doona qorsheynta iyo diyaarinta dhaqaalaha dalka iyo adeega guud ee bulshada. Isla markaa wuxuu xisbigu u taagan yahay sidii loo hirgalin lahaa ugu danbaynta Daryeel Guud ee Caafimaad iyo Waxbarasho Guud, (General Health Care and Universal Education).

Xisbigu wuxuu dhiirigalindoonaa hirgalinta iyo hanaqaadka Urruro Madaxbanaan oo Shaqaale (Labour Organisation) oo casri ah si ay u ilaaliyaan midhaha dimuqraadiyada iyo xuquuqda xoogsatada iyo xafidaada daryeelka bulshada.

Si loo helo bulsho hirgalisa isla markaana hanata barnaamijyada xisbiga, waxa xooga la saaridoona sidii lacag badan loo galin lahaa waxbarashada iyo caafimaadka "Eeg siyaasada Waxbarashada iyo caafimaadka"