Wuxuu xisbigu samayndoonaa Waasaarad ballaadhan oo loo bixindoono Waasaarada Horumarinta Xoolaha iyo Khayraadka Badda. Waasaradu waxaa loo goyndoona loona qoondayndoonaa lacag badan oo ay ku horumariso dhaqniinka xoolaha iyo lasoo baxa kalluunka badda. Waxaa la samayndoonaa hooy lagu baadho nolosha xoolaha iyo sidii loo horumarin lahaa.

Wuxuu xisbigu samayndoonaa BAAN U GAAR AH HORUMARINTA XOOLAHA IYO KHAYRAADKA BADDA. Waxaa la amaahindoonaa dadka xoolaha dhaqda iyo dadka soo saara kalluunka lacag amaah ah oo aan lahayn dulsaar iyo muddo dheer oo ay ku bixiyaan. Waxaa lacagta loo siindoonaa sida ay u kala xoola badanyihiin, xoolo badanow hel amaah badan, isla markaa waxaa la amaahin doonaa lacag badan qofkii amaba shirkadii soo qaabata kalluun badan.

Waxaa la casriyayndoonaa magaalooyinka xeebta tiiyoo loo samayndoono wadooyin fiican iyo isgaadhsiinta casriga ah.. Waxaa laga dhaafi doonaa cashuurta qaboobiyayaasha lagu isticmaalo magaalooyinka xeebta iyo talaajadahaba. Waxaa la khafiifindoonaa cashuurta shaqaalaha iyo dukaamada ka furan magaalooyinka xeebta. Waxaa la siin doonaa mudnaanta mashaariicda la galinaayo xoolaha soo saarka kaluunka iyo daryeelka reer guuraaga iyo kaluumaysatada. Waxaa la dhiiri galindoonaa dhoofista kalluunka, xoolaha iyo milixda. Waxaa la dhiirigalindoonaa maal galinta dhinacyada xoolaha iyo kalluunka ee dalka. Waxaa isla markaa la wacyi galindoonaa shacbiga iyadoo loo sheegayo nacfiga iyo nafaqada cunitaanka kalluunka. Waxaa laga shaqayndoonaa sidii loo samayn lahaa shirkado wadani ah oo u khaas ah dhoofista kalluunka.

Xisbigu wuxuu qaadi doonaa siyaasad weerar ah oo lagu raadinaayo suuqyo loo diro xoolaheena kana baxsan kuwa Carabta. waxaa la badali doonaa habkii gaboobay ee aynu xoolaha u raaci jirnay una dhoofin jirnay. Waxaa si tartiib ah loo soo afjari doonaa xoolihii noolaa ee loo dhoofin jiray, tiiyoo lagu badali doono dhoofista hilibka. Waxaa la sugi doonaa hantida iyo xuquuqda xoolo iyo kaluun dhoofsatada. Waxaa kor loo qaadidoona nadaafada iyo caafimaadka goobaha xoolaha lagu qalo iyo kaydinta kalluunka.

Waxa la samayndoonaa waaxyo wasaarado ah oo ka mas'uul ah ka hortaga abaaraha, iyadoo lagu qasbi doono gaadiidka biyaha qaada iyo baabuur gurta xoolaha, hadii loo baahdo in xoolaha laga raro meelaha abaarta ah.Waxaa lagu daadaali doonaa sidii mardambe biyo la'aani u hesheen xoolaheena.

Waxaa la samayn doonaa kuliyado aan ku koobnayn hal gobol ee gobolada xooluhu ku badan yahayba laga hirgalin doono. Waxaa la dhiirigalidoonaa barashada dhaqniinka dakhtarada xoolaha. Waxaa xisbigu ku dadaalidoona sidii loo samayn lahaa meel lagu baadho GEELA, iyo sidii loo horumarin lahaa cunitaanka hilibka geela ee dadka aduunka. Waa in la qaadaa olole lagu barayo bulshada caalamka cunitaanka hilibka geella, waa in la muujiyaa manfaca iyo caafimaadka ku jira hilibka iyo caanaha geella.

Waxaa si wayn loo dhiiri galindoonaa dhaqashada xoolaha, tiiyoo culays la saari doono sidii loo baabi'in lahaa isku xidhka xoolaha iyo badaw nimada. Waxaa la dhiiri galindoonaa habka casriga ah ee loo dhaqo xoolaha iyadoo dhaqniinka xoolaha la casriyayndoono. Waxaa laga shaqayn sidii dadku aanay ugu soo durdureen una soo guureen tuulooyinka iyo magaalooyinka, si taas loo hirgaliyo xisbigu wuxuu ka shaqayn doonaa sidii kor loogu qaadi lahaa nolosha miyiga iyo reer guuraaga. Waxaa la horumarin doonaa daaqsinta xoolaha tiiyoo dhulka lagala dagaalami doono nabaad guurka iyo xaalufka. Waxaa la samayndoonaa koox dhakhaatiir ah oo guurta kuna soo wareegta dhulka miyiga si ay u ilaaliyaan caafimaadka xoolaha.

Waxaa la casriyayn doonaa goobo caafimaadka ee tuulooyinka miyiga dhaw si dadka xoolaha dhaqataa uga faa'iidaystaan caafimaadka reer guuraagana kor loo qaado, kana maarmaan magaalooyinka waaweyn. Waxaa loo qoondayn doonaa miinsaaniyad wayn hormarinta xoolaha iyo xoolo dhaqatadaba. Waxaa culayska la saaridoona sidii loo horumarin lahaa daaqsinta xoolaha iyo biyaha ay cabaan.

Waxaa la samayndoonaa maalin lagu xuso reer miyiga iyo xolaha (tiiyo dadka laga dhaadhicinayo faa'iidada xoolaha ay u leeyihiin dadka iyo dalkaba) kaas oo lagu qaadaa dhigo dhaqanka iyo nolosha reer guuraaga. Waxaa lagu dari dadka xoolo dhaqatada gudiyaasha iyo hogaamiyayaasha Wasaarada Xoolaha iyo Khayradka Badda. Waxaa laga barandoonaa daaweynta xoolaha ee soo jireenka ahayd si ay uga faa'iidaystaan dhakhtarada waqtigani. Waxaa lasoo afjaridoonaa hoos u dhiga ka jiray xoolo dhaqatada ee loo qabay wax laga ilbxo.

Xisbigu wuxuu mudnaanta siindoonaa hagaajinta iyo sidii loo wanaajin lahaa nolasha, waxbarashada iyo caafimaadka xoolo dhaqatada. Waxaa la sahamin doonaa sidii xoolaha loo yarayn lahaa in ay guur-guuraan, isla markaa loo beeri lahaa cawska iyo dhirta geelu jecel yahay in uu cuno. Geela oo ah calaamad dalkeena ku caan yahay noolasheena iyo dhaqankeena ku lifaaqantahay waxaa lagama maarmaan ah in culays la saaro sidii loo kordhin lahaa tiradiisa iyo tarankiisaba.