Xisbiga UCID Oo Naqdiyey Miisaaniyadda:

Justice and Welfare Party (UCID)

 

‘’THE RIGHTS WE ENJOY REFLECTS THE DUTIES WE OWE’’

Hargeysa UCID Xisbiga Cadaaladda iyo Daryeelka ayaa si weyn u naqdiyey kuna tilmaamay Miisaaniyadda 2006 ee Somaliland oo hadda hortaalla Golaha Wakiiladda mid mad madaw badani ku jiro.

Shir Jaraa'id oo uu maanta Xafiiskiisa ku qabtay Afhayeenka Xisbiga UCID Md Xasan Xuseen Maxamed ayuu ku sheegay in khalad weyn iyo mad madaw aan qarsoodi lahayn uu ka muuqdo Miisaaniyaddani, Mudane Xasan Xuseen wuxuu ugu baaqay Mudanayaasha Golaha Wakiiladda Gaar ahaanna kuwa ku abtirsada Xisbiyada Mucaaridku inay wax ka bedel iyo kaabid weyn ku sameeyaan Miisaaniyaddani.

Mudane Xasan oo ka hadlaaya nidaamka ay Miisaaniyaddu u degsantahay ayaa sheegay in aan laguba tilmaami karin Miisaaniyad maadama aanay meeshaba oolin Xisaab Xidhyadii sannadahii ka horeeyey, Waayo ayuu yidhi Md. Xuseen Caqliga saliimka ah ee caafimaadka qaba ee aqoonta iyo cilmiga leh ma qaadan karo wax duuduuban in liq lagu yidhaahdo, taasina waxay ka dhigantahay ayuu yidhi sida Foolxumada leh ee ay Wasaaradda maaliyaddu usoo mal maluuqday Miisaaniyaddani, Mudane Xuseen wuxuu xasuusiyey Mudanayaasha aqalka wakiiladda inay u taaganyahiin maanta kalsoonida Shacabka, laba arrimood midkoodna ay ummaddu ka sugayso inay lumiyaan kalsoonida Shacabka oo ay Miisaaniyaddani sideeda ku sii daayaan iyo inay xasuustaan ballantii ay ilaahay iyo ummadda u qaadeen.

Mudane Xasan Xuseen Maxamed Wuxuu sheegay in mawqifka Xisbigiisa UCID uu ka taaganyahay arrimaha miisaaniyaddani tahay in si weyn wax loo saxo, dibna loogu noqdo miisaaniyaddani oo wax weyni ka maqanyahiin, wuxuu sheegay in ay xaq tahay in la helo Dakhligii dekedda Berbera oo uu sheegay inaanay miisaaniyaddani la soconin, wuxuu Mudane Xuseen tibaaxay in dakhli farabadan oo kale ka maqanyahay qasnadda Miisaaniyaddani, iyadoo uu ku tilmaamay in jeebado kale uu dakhligaasi ku maqanyahay.

ugu danbayntii Wuxuu Afhayeenka Xisbiga UCID kula dar daarmay Mudanayaashu inay wixii ay qarranka ugu xil saarnaayeen qiimeeyaan, ogaadaana in ay matalaan shacab aradan oo wax allaala iyo wax u yaalla aanay jirin.