Guddoomiyaha Xisbiga UCID oo Kulan
Balaadhan La Yeeshay Jaaliyada SOMALILAND ee Magaalada STOCKHOLM Iyo Madaxda Arimaha
Dibada Ee Dalka SWEDEN:
Stockholm (UCID)Wefti uu hoggaaminayo Gudoomiyaha Xisbiga UCID, Inj. Faysal Cali Waraabe,
ayaa bookhday magaaladan Stockholm wiiggii hore. Socdaalkan oo qeyb ka ahaa
socdaallo dhowr ah oo uu gudoomiyuhu ku marayay dalalka waqooyiga Yurub ayay
ahayd goobtii ugu dambeysay ee uu ku khatimo socdaalkiisa.
Gudoomiyuhu, intii uu joogay magaalo madaxda dalka Sweden, wuxuu kulan la
qaatay Danjire cusub oo loo magacaabay dalalka geeska Afrika oo la yidhaahdo
Marita FaleŽn. Danjiraha oo loogu magac daray ergayga gaarka ah ee dawladda
Sweden ee geeska Afrika, waxay dawladda Sweden ku xoojisay siyaasaddeeda ku
aadan geeska Afrika iyo guud ahaan arrimaha Somalida, oo ay Sweden, si aan la
qiyaasi karin, muddadii dambe iskugu hawshay.
Kulankan uu Inj. Faysal la yeeshay Ergayga gaar ahaaneed ee dalka Sweden ee
Geeska Afrika, wuxuu noqday madaxii kowaad ee ay kala kulanto dalkii la isku
odhan jiray Somalia, waxayna labada dhinaca is weydaarsadeen warbixinno iyo
fikirado.
Gudoomiyaha UCID, wuxuu si qoto dheer ugaga waramaya Marita, dimuquraadiyada
curdinka ah ee ka hana qaaday Somaliland iyo guud ahaan, mowqifka biyo kama
dhibcaanka ah ee ay taagan yihiin dawlad iyo shacbiba dadka reer Somaliland.
Sidoo kale Marita, iyana waxay Faysal iyo weftigii UCID ee la socday, uga
warantay inay shaqadan ku cusub tahay, laakiin ay waayo aragnimo badan u
leedahay meello Somalia oo kale ah, oo ay ka dhaceen dhibaatooyin faraha lagaga
gubtay. Run ahaantiina ay doonayso inay si wax ku ool ah, uga shaqo gasho.
Sidoo kale, waxay u sheegtay weftiga inay Somaliland ka maqashay amaan badan
oo bulsha weynta caalamku ka bixiyeen Somaliland iyo dimuquraadiyada iyo nabadda
ka jirta. Waxay ballan qaaday inay doonayso, nafteedu inay soo bookhato,
Somaliland sida ugu dhakhsaha badan, ula yeelatana xidhiidh wacan dawladda iyo
shacbiga Somaliland.
Guddoomiye Faysal, intii uu joogay Stockholm, waxaa kale oo u suurtogashay
inuu la kulmo dadweynaha ka tirsan Jaaliyadda Somaliland ee ku nool magaaladan
Stockholm. Wuxuuna siiyayay warbixin dheer oo la xidhiidha xaaladda iyo
marxaladda uu hadda marayo dalkii hooyo. Wuxuu si guud ugaga waramay
dhacdooyinkii ugu dambeeyay ee ay ku dhaga taageen iyo dhibaatooyinka guud ee
horumarka Somaliland hakiyay.
Waxay iyana dadweynihii nasiibka u yeeshay inay kulankaas ka soo qeybgalaan,
weydiiyeen Faysal Cali Waraabe, su'aallo badan oo ay gucanayeen, oo la xidhiidha
xisbiga uu hogaanka u hayo iyo guud ahaanba dalka hooyo, oo dhinacyo badan lahaa.
Ugu dambeyntii waxaa uu shirkaas ballaadhan ee Gudoomiyaha Xisbiga UCID la
yeeshay bulshda Somaliland ee ku nool Stockholm ku soo dhammaaday jawi iyo
faraxan badan.
Ahmed Abdillahi Awale
